Antropologia noa: sos sardos-islavos ant a èssere «meres»

Ernesto De Martino (a manu manca) e Alberto Mario Cirese

Sa Sardigna est logu de antropologia.
Che sunt aprodados Ernesto De Martino e Alberto Mario Cirese (sos duos òmines nòdidos de s’antropologia italiana de su milli-noighentos) chi ant insingiadu in Casteddu a cumintzare dae sos annos chimbanta; Franco Cagnetta s’est fatu a connòschere cando at iscritu «Inchiesta su Orgosolo» publicada in sa rivista Nuovi Argomenti in su 1954 e luego secuestrada dae cuddu ministru Scelba pro àere infamadu sos sordados de s’Istadu.
Posca sunt bènnidos sos nostros, Michelangelo-Mialinu Pira, Placido Cherchi, Pier Giorgio Solinas, Pietro Clemente (custu de Cirese nd’at leadu sa càtedra in s’Universidade “La Sapienza” de Roma), Giulio Angioni, Bachisio Bandinu. Non nos ismentighemus su chi dae s’antropologia at leadu (a pane prèstidu) Antonio Pigliaru cun cuddu libru mannu La vendetta barbaricina come ordinamento giuridico, o si nono su documentarista Vittorio De Seta chi in antis fateit sos documentàrios “Pastori di Orgosolo” e “Un giorno in Barbagia” e posca at fatu su film su prus mannu de totus, “Banditi a Orgosolo”, premiadu in Venezia in su 1961. B’amus fintzas su fotògrafu Franco Pinna chi de Orgosolo, semper in cussos annos, nd’at contadu sa vida e sos dillìrios de disisperu.
Istudiosos de oe e de cras ant a giogare partidas curiosas. Non prus sotziedades antigas ebbia, logos de maghias, tramudamentos de pastores. E non solu criminalidade chi brotat dae s’aguantu contra de sos inimigos istràngios. Chie s’at a istudiare sa Sardigna at a dèvere pensare bene a duas cosas: a s’ispopolamentu de sa parte de intro e a s’acudida de sos islavos.
Sas biddas de intro sunt apretadas dae su minimare de sa populatzione e abbàidant semper de prus sos logos de mare comente aprodu pro s’incràs. Oschiri, Logudoro-Monte Acuto, in sos annos chimbanta tocaiat sos 4.800 tzitadinos, in su 2030 lu dant a 2.900; Bitti, cabu de subra de sa Barbagia, nde contaiat prus de 5.000 e in giru de binti annos a oe nd’at a fàghere prus pagos de 2.500. De custa manera non mudat s’istatìstica ebbia, mudat su mundu sardu. Santu Teodoro e Budoni, unu tempus biddas comente nche nd’aiat meda, oe chi est oe sunt logos de su tzentru de su cummèrtziu e a punta in antis in s’acollire gente dae totue. Terranoa-Olbia dae 10.000 tzitadinos at barigadu sos 45.000. Como, pro nàrrere, cal’est s’incàrrigu in sa sotziedade e in sa cultura sarda chi diat dèvere pòdere leare una tzitade comente Terranoa chi pro annos meda at acollidu sardos de totue? Ite si diat dèvere pòdere fàghere pro non nche frundire s’ereu de istòria e de cultura de custa gente tramudada dae sa parte de intro a su logu de mare? Custu ereu, como non prus, non podet èssere postu a cùrrere dae biddas ispogiadas de gente e de ànimu. Chie l’at a fàghere e comente?

Su mundu de sos pastores est suferente meda. Su late no at preju, balet prus pagu de bintighimbe annos faghet. Su pastore no est prus in bidea de sighire una vida chi non li faghet connòschere nudda. Posca, in sa bidda, no est prus su «printzipale», fintzas agatare mùgere li benit in pigada. In mesu a custu ponimusbei chi trumas de islavos faghent sos teracos-pastores e una chedda de islavas si proponent a fàghere sas muzeres de pastores. Sos tzeracos buscant 500-600 èuros a su mese e in nieddu. Sas mùgeres islavas benint pregadas e adoradas comente madonnas disigiadas e no àpidas. Custas feminas islavas cherent s’Otzidente e lu disìgiant forte forte. Sos omines-pastores, intrapulados in d’unu aguantu betzu cant’est su mundu ma chena sas soddisfatziones de unu tempus, isperant de agatare femina chi potzat aguantare sa vida issoro. Forsis li paret manera de incurtziare custu mundu difìtzile chi los bidet sighire, emmo, ma fintzas fattendesi fuire sas feminas de su logu. Feminas chi cherent àteru, chi non lis interessat sa «positzione» ma chi cherent amorare e disigiare, comente in d’una paristòria, sa gioventude europea, mancu italiana! Pro pastores medas, a bortas, est prus in falada a si cojuare una pisedda islava chi una femina de sa bidda. In custu tzoroddu de bonos e malos sentidos s’abojana su disànimu pro èssere isputzidos e su disisperu pro sas pagas soddisfatziones de su trabàgliu. Custu arresonu at a sighire a crèschere. Posca bastat su computer de un’amigu istudiadu pro si pòdere iscrìere a giassos web in ue feminas islavas chircant òmines otzidentales. De custa manera sa soledade s’aguantat de prus. E tando diamus pòdere nàrrere chi sos sardos a campu bi cherent andare semper prus pagu e cando sos ùrtimos de sos mohicanos ant a mòrrere a campu b’ant a andare sos islavos (ca in su mentres sunt inoghe dae meda e ant a connòschere bene custu trabàgliu) o si cherides sos sardos-islavos. E ant a comporare sos terrinos (àteros los ant a buscare in eredidade) e ant a èssere sos meres. Sas biddas nostras it’ant a èssere? Logos-ispizios-dormitorios pro tramudadores fitianos chi onni die tzucant a traballare a sa tzitade o a su logu de mare. E in su caminu fitianu chi ant a fàghere s’ant a abbigiare chi sas tancas prus mannas ant èssere de sardos-islavos o de islavos. E in totu custu sos pastores ite limba ant a faeddare?

Oe amus una legione istrangia in intro de domo chi cras at a èssere sarda e totu. Ite fraigamus tando pro s’incràs? S’ànimu de milli annos at a aguantare o amus a dèvere istelevrare in manera noa? Custu l’aia chèrfidu preguntare a sos antropòlogos de s’incràs e fintzas a sos de oe (Clemente, Bandinu, Angioni, Solinas); ite podet dare s’antropologia pro lèghere mègius su tempus de como?

Annunci

5 pensieri su “Antropologia noa: sos sardos-islavos ant a èssere «meres»

  1. Sebastiano Mannia

    No so Angioni, né Clemente, chi puru connosco e menzus de me diana risponnere a sa dimanna posta. Comente antropologo e comente pessone chi dae metas annos istudiat custas chistiones, poto narrere: 1) s’arrivu de sos islavos at garantitu in sos urtimos deche-binnichi annos a su settore pastorale de no annaret prus male de comente est annanne. Grathias a issos metas cuiles no ana tancatu prima ‘e su tempus. 2) si annamus a bidere cantu de custos theraccos abbarrana in Sardigna a longu, nos rennimus contu chi pacos an a essere sos chi ana a ritirare sas terras de sos pastores de oje.
    Certu, cojuvios tra sardos e islavas bi n’at, comente pithinnos chi an a ereditare terras e cuiles. A parrer meu, si possibilitate b’at de videremus su ch’est istatu natu supra, si n’at a aeddare tra meta e metas annos.
    A urtimu: s’antropologia potet galu dare meta pro cumprennere sas cosas de oje. S’arrejonu est chi ispesso no si ne li dat sa possibilitate.

  2. Pingback: Sos post prus lèghidos de su 2014 (iscritos in sardu) | Roberto Carta

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...