Renzi solovrat a Grillo. (Pro neghe de Grillo…)

Grillo Renzi

Non est chi at bìnchidu Renzi, non, naramus su chi est, non lis at lassadu mancu tretu a fuire! Grillo at pèrdidu, Berlusconi s’est imbertu, Alfano non est mai nàschidu.

Carchi parre.

  1. Pro Renzi est una bìnchida manna a beru, medas si lu fragaiant chi podiat essere gasi, forsis lu seraiant a curtzu a su 35%, ma a che barigare finas su 40% fiant bator gatos a lu pensare! Su chi ispantat non est chi apat bìnchidu, ma comente l’at fatu. At tentu votos a duas bias de su M5S, a su PD lis at fatu balangiare duos milliones de votos de prus de ocannu passadu cun Bersani. A parre de medas Renzi si balet oe su 1994 de Berlusconi, at a essere isse a solovrare sa polìtica italiana pro nessi 20 annos (in Itàlia s’ischit, si unu partit bene in polìtica campat a lu nessi 20 annos). Sos malignos narant chi male chi andet est unu Berlusconi nou o, bene chi andet, unu De Mita nou. Diamus narrere, su chi bi cheret pro essere su leader de unu tempus longu meda! Est resessidu a binchere finas cun candidadas comente Picierno e Bonafè, raju! A narrere chi at bìnchidu pro sos 80 èuros est a narrere nudda, custu lu cumprendant prus a totu sos de su M5S. Renzi at bìnchidu pro parìgias cosas: s’agiudu mannu de sos medias, ca dat s’idea de una muda pasada de sas cosas e semper intro sa chi est sa cultura de sos italianos, ca proite ischit essere abbistu, non est dudosu e donada seguresa. In una Europa in ue si faghent logu tzertas destras curiosas s’Itàlia at a isse. Capatzu chi ordinget de andare luego a su votu, gasi si che giùghet a domo una bìnchida bùlgara e, a custu giru, finas polìtica. Tando, cun unu parlamentu sou, unu «parlamentu de Renzi», si diat podere permitere de bogare a pìgiu totu sas riformas chi cheret. Civati e Cuperlo non contant prus nudda, cheret chi si fatzant a un’ala, oramai podent acollire pabireddos ebbia.
  2. Su M5S nd’essit male, emmo, ma non pro sos votos, cussos sunt medas. B’essit male ca su leader maximo Grillo at chertu giogare tropu cun su fogu e sa fine si b’est brusiadu. Non s’est acuntentadu de podere lompere segundu, nono, cheriat binchere chena mancare, cheriat unu referendum intre isse e Renzi. Su referendum a dolu mannu de Grillo l’at bìnchidu Renzi. Su chi ispantat est s’iscartu intre PD e M5S, 20 puntos pertzentuales chie si los isetaiat? Su resurtadu non est malu ebbia, ocannu passadu chie b’aiat pòdidu creere a unu Di Battista a su 21% chi che colat unu Berlusconi chi si firmat a su 15%? S’arresonu est chi Grillo at apretadu tropu su pòveru «ronzinu» (iscriat gasi Peppinu Mereu…) e sa chi podiat essere una podda numèrica s’est fata una surra de sas prus mannas de totu custas eletziones europeas. Tzerrimu, pro meses, fatu a sas pratzas de Itàlia istaiat aboghinende «#Binchimusnois», o si nono «Los barigamus e lompimus a su 30%», o finas «Si non binco mi besso deretu». Si posca mesu mundu ti faghet a befe non ti deves lamentare. E difatis, finas isse a sa moda de Civati e Cuperlo, l’at cumprida a collire pabireddos. Cun totu chi Grillo si faghet logu cun 17 eurodeputados e non mi parent pagos pro nudda. Est chi tocat de s’ammentare chi a fortza de ammuntonare “i like” in facebook e in twitter calicunu, forsis, non at pensadu prus a comente est s’Itàlia, e s’Itàlia est fata màssimu de gente chi a pratza non b’essit e chi in s’oru de s’ùrtima ora ebbia detzidet pro chie votare. E sos chi non ischiant a chie votare a sa fine si los at papados Matteo Renzi. A onni manera essere segundos non est cosa mala, bastat de cumprendere comente lu essere. Forsis si diat podere narrere chi un’istadu ghiadu dae Renzi cun su puntòrgiu de Grillo est cantu de mègius potzat meritare custa Itàlia de tertzu millènniu.
  3. Berlusconi est a sa frùtora, belle che mortu: non su berlusconismu (antzis), ma isse emmo. Finas si in cale si siat àteru logu de su mundu aiat pòdidu leare màssimu unu 5% e inoghe est lòmpidu a su 16%. Istare neende chi non est andada gasi male est a narrere nudda finas in custu casu. Cun Renzi chi cumandat Berlusconi non est prus a sa moda.
  4. Sa Lega, raju, est andada bene. Salvini at dadu caddos a una bella e animosa campagna eletorale, a manera de un’òmine de destra e non mi paret chi che nd’apat meda de òmines de destra. Alfano, narat Andrea Scanzi, est una «categoria de s’ispìritu de Hegel». Su NCD at prus indagados chi eletores. A onni manera, atapa como atapa posca, nessi tres in Bruxelles che los ant cravados. Fratelli d’Italia e Monti, ohi ohi! Su segundu non nd’at pesadu mancu sas catzolas.
  5. Tsipras, a s’urtima iscutinada paret chi bi l’apat fata a che colare su 4%. Est cosa nòdida.

*Iscritu chirchende de sighire sas regulas de sa Limba Sarda Comuna.

**Solovrare=(italiano “Sciogliere”)

***Tzerrimu=(italiano “Cocciuto”)

****Catzolas=(italiano “Pantofole”)

 

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...