S’importàntzia de su Sòtziu Tenores Sardigna e de sos 28 atòbios “Limba e Tenore”

Tenore Musserrata
Tenore Musserrata de Ulìana – Foto de Stefania Urru

Torro gràtzias, e meda, a su Sòtziu Tenore Sardigna chi sàpadu 24 de su mese de maju m’at cumbidadu a s’atòbiu “Limba e Tenore. In ammentu de Piero Sanna”. Est istadu unu de sos 28 atòbios chi su sòtziu at contivigiadu in sos ùrtimos duos meses, cumpridos su sàpadu in fatu, su 31 de maju, in Abbasanta. Una manifestatzione manna a beru, 28 biddas interessadas, deghinas e deghinas de grupos chi cantant a tenore, òmines mannos (su prus mannu, Daniele Cossellu de su Tenore Remunnu ‘e Locu de Bitti, nd’at 82 de annos) e piseddutzos atentzionados a cantadas dìligas, etno-mùsicologos e maistros de cultura e de limba sarda chi ponent a cùrrere su fungudùmine de sa cultura de sos sardos in mesu a cantadas chi ispantant e faghent perdere sos sentidos.

Sàpadu m’est tocadu de fàghere sa faeddada in fatu de sa prima cantada de su Tenore Remunnu ‘e Locu e, prus a totu, in fatu a sas paràulas betadas dae Daniele Cossellu in ammentu de s’amigu e cumpàngiu de vida Piero Sanna, chi dae pagu si nch’est andadu a cantare aterue.

Cossellu
Daniele Cossellu – Tenore Remunnu ‘e Locu de Bitzi  – Foto de Stefania Urru

Non est istadu fàtzile a nudda ca proite su cumprendòniu meu in fatu de poesia e de cantu a tenore s’est pesadu iscurtende sas boghes de Piero Sanna e de Daniele Cossellu. Mi so intesu in pigada pro custu. Luego m’est bènnida a idea una de sas primas intzisiones issoro, de baranta annos faghet, e in mesu a cussa musicassetta de tando, semper cuitende, sa conca mia at ischirriadu sa poesia “Non sias isciau” de Remundu Piras, iscrita a taulinu, posta a cùrrere cun unu cantu a istèrrida dae sa boghe de Piero Sanna:

O sardu, si ses sardu e si ses bonu,
Semper sa limba tua apas presente:
No sias che isciau ubbidiente
Faeddende sa limba ‘e su padronu.

Sa nassione chi peldet su donu
De sa limba iscumparit lentamente,
Massimu si che l’essit dae mente
In iscritura che in arrejonu.
Sa limba ‘e babbos e de jajos nostros

No l’usades pius nemmancu in domo
Prite pobera e ruza la creides.
Si a iscola no che la jughides
Po la difunder menzus, dae como
Sezis dissardizende a fizos bostros

Barigados baranta annos semus semper inoghe a faeddare de custu contu longu de sa limba sarda chi s’est perdende. A onni manera, cun su Tenore Remunnu ‘e Locu apo àpidu su praghere de iscurtare torra sa boghe (e mesu boghe) Dalleddu-Dino Ruiu, ateruna chi m’at fatu a connoschere e finas a cumprendere mègius tzertas poesias de sos majores comente Padre Luca Cubeddu, sa mesu boghe (e boghe) de Daniele Cossellu, sa contra de Pier Luigi Giorno, su bassu de Mario Pira. Paris cun issos ant cantadu e presentadu poesias, paràulas e limba, su Tenore Santu Padre de Bortigale, su Tenore Musserrata de Ulìana (Oliena), su Tenore Garteddesu de Garteddi (Galtellì), su Tenore Matteoli de Ovodda, su Cuncordu Bortigalesu.

Cosa dìliga a beru, e importante, est chi minores e mannos ant su matessi nùmeru, su matessi passu e, pro la narrere cun su limbàgiu de su Tenore, su matessi puntu. E m’at comente ispantadu de aere intesu giovaneddos gasi bravos in su cantu. In su Tenore Musserrata, pro narrere, b’at cantadu piseddos chi non ant lòmpidu mancu sos degheoto annos. E connoschende sa moda ulianesa bos potzo narrere chi sa cantada l’ant pesada bene a beru: a sa sèria, a passu torradu, a ballu e a mutos. Ateretantu m’est pràghida sa moda de Bortigale, bene contivigiada dae su Tenore Santu Padre e dae su Cuncordu Bortigalesu. Boghes potentes chi faghent andare su tenore in su ballu e chi lu imbitzant in sa cantada a sa sèria. Su Tenore Garteddesu, aterunu de giovaneddos, est de bellas armonias e acordos, brotat fortza e seguresa. Su Tenore Matteoli de Ovodda at istèrridu sa moda de cantu de cussa Barbagia e l’at fatu a sa sèria e a ballu. Grupu fatu dae mannos, prus a totu sas boghes, e giòvanos impare.

Pubblico Tenore
Valentino Congiu – Boghe de su Tenore Musserrata de Ulìana – Foto de Stefania Urru

Fabio Calzia, Etno-mùsicologu, at bantadu sa capatzidade de su cantu a tenore de non essere semper su matessi ma de mudare in fatu a sos logos de cantu. E tando b’amus a aere su cantu de campu, su cantu de crèsia, su cantu de pratza in mesu a su degòlliu de sa festa, su cantu de sas tzerimònias. In custos annos, semper de prus, s’at fatu logu su cantu in su palcu, su cantu in televisione o su cantu in teatru. Su Tenore, a cantu paret, est ponende in fatu a su tempus in sa manera sa prus giusta, nde sighit sos banzigos e si bestit de pìngios noos.

Fabio Calzia
Fabio Calzia, Etno-Mùsicologu – Foto de Stefania Urru

Deo apo contadu comente si prendent limba, poesia e cantu e ite bellu imbòligu bi essit. Su tenore, pro tempus meda, at ispartu limba e poesia, e si pensamus a sos annos setanta-otanta, ma finas a annos prus a curtzu a oe, diamus narrere chi est istadu unu de sos prus importantes trastos pro insingiare e/o sighire a faeddare su sardu. Si est beru chi b’amus tenores chi ant giradu su mundu, tando est beru chi su mundu at pòdidu connoschere sa limba de sos sardos, medas bias, propriu pro mèdiu issoro. Tzertu, como cantare a tenore est prus a sa moda, ma àteros annos non fiat gasi. Onore duncas a chie pro annos at cantadu in fatu a sa Sardigna e a su mundu e at dadu manera de mantennere sa traditzione ma finas de la faghere creschere. In custu aboju b’apo bidu un’òmine de 82 annos e piseddutzos chi non ant giompidu mancu sos degheoto. Custu est su Cantu a Tenore e sa fortza sua!

RobCartaBortigali
Dae manu manca Antiogu Bussu e Roberto Carta

Antiogu Bussu, de su Sòtziu Tenores, at mantesu e contivigiadu sa serada, at dadu su tempus de sas faeddadas e ammentadu su bonu traballu de su Sòtziu. At finas mentovadu sa bellesa de intendere, postas a cumone, sas modas de cantu paris cun sas faeddadas in sardu. Unidade e richesa.

Persones de giudu sos de su Sòtziu Tenores Sardigna. Ant pensadu a una cosa nòdida a beru, primu a faghere su sòtziu e custu oramai dae annos, segundu a istelevrare custos 28 abojos in 28 biddas e cun prus de chentu tenores postos a currere. Saludu a su Sòtziu, saludu a su Tenore.

*Nde faeddat finas Antonella Licheri in custu giassu

**Punghide in sa foto pro la faghere prus manna.

Tenore Santu Padre de Bortigale
Tenore Santu Padre de Bortigale
Sa boghe de su Tenore Matteoli de Ovodda
Sa boghe de su Tenore Matteoli de Ovodda – Foto di Stefania Urru
Cuncordu Bortigalesu - Foto di Stefania Urru
Cuncordu Bortigalesu – Foto de Stefania Urru
Tenore Garteddesu - Foto de Stefania Urru
Tenore Garteddesu – Foto de Stefania Urru
Tenore Remunnu 'e Locu - Foto de Stefania Urru
Tenore Remunnu ‘e Locu – Foto de Stefania Urru
Annunci

Un pensiero su “S’importàntzia de su Sòtziu Tenores Sardigna e de sos 28 atòbios “Limba e Tenore”

  1. Pingback: Sos post prus lèghidos de su 2014 (iscritos in sardu) | Roberto Carta

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...