The Guardian: «A pagu tretu dae sa “costa cun caviale” sa Sardigna sa prus ‘vera’ cantat sa cantzone trista de su chi non s’est fatu mai»

S'artìculu chi at iscritu Lizzy Davies, pubblicadu eris, proThe Guardian
S’artìculu chi at iscritu Lizzy Davies  pro The Guardian. Pubblicadu eris.

The Guardian, eris, at pubblicadu un’artìculu subra de sa Sardigna intervistende finas a mie. Bo lu torro in sardu! (Artìculu in inglesu, faghe clic inoghe)

….A manu de intro de sas renas de mare glamour, s’ìsula italiana oferit màndigu bonu meda e cultura chi diat chèrrere essere contivigiada e promòvida….

A punta de mesudie, in su Museu Archeològicu e Etnogràficu, si serat una mùida chi essit dae su computereddu de su gestore Giorgio Pala. “Ìsula biaita, terra de cuntentesa”, cantat una boghe de mascru, in italianu, acumpangiada dae una musichedda pop de nudda. “Inoghe s’àera est a puntu giustu, su nuscu ischit de eternidade”. Narat Pala, chi paret un’ursu mannu cun s’arva mùrina e sos chìgios chi faeddant a sa sola, cuende ma non tropu s’àscamu.  “E ite potzo narrere? Pòveru cristianu!” nche li essit. “Est a beru, su mare inoghe ispantat, est unu mare biaitu, emmo, ma forsis sa parte prus bella de sa Sardigna est cussa a manu de intro. A tesu dae custos logos…” sighit s’arresonu in perintantu chi firmat su computer e cun una ograda pasada torrat a sos siddados nuràgicos e a sas prendas romanas a dae in antis suo.

A primos de su mese de trìulas, mòvidu dae s’oriolu pro s’economia posta male de sa segunda ìsula prus manna de Itàlia, Giulio Rapetti, unu de sos cantautores prus connotos, at presentadu una cantzonedda e nd’at faeddadu comente de unu “donu minoreddu”. Sos de s’assessoradu a su turismu de sa Regione Sarda ant naradu chi custa cantzone est una “trata dilliriada”, chi faghet rebota cun sos “colores, sas atratziones e sas traditziones” de s’ìsula, e chi cheret essere una “publitzidade nòdida pro sa promotzione turìstica”. Ma non totus in Sardigna si sunt fatos leare a custa manera.

“Sa Sardigna, in sos sèculos, at pesadu artistas mannos e iscritores e poetes medas”, at iscritu s’atritze Francesca Petretto in unu blog pro “Il Fatto Quotidiano”, tzitende DH Lawrence e Carlo Levi. “Como, naraia a mie matessi, b’est Mogol (comente totus cramant a Rapetti), cosa de ischire cun cales bantzigos  at ponnere paràulas dìligas pro contare de s’ispantu de su logu meu?” A dolu mannu suo Petretto, posca de àere iscurtadu sa cantzone,  at seradu “unu  jingle a mesu caminu intre una publitzidade de Costa Crociere e sa colunna sonora de Sa Sirenedda de Disney”. Ma su dolu non est in sa cantzone, chi naschet dae un’idea bona. Su dolu est chi mentovende sas renas de mare sardas at tocadu su tasteddu: s’ìsula diat chèrrere – ma non bi resessit – fraigare una manera de faghere turismu prus a mesura de Sardigna intrea, chi agiuet onni parte e logu, totu s’annu, e non in su mare ebbia. Unu turismu chi, tando, diat permitere a Pala de ammustrare su Museu chi gestit e paris sas àteras bellesas archeològicas de su logu suo. “Sos turistas chi benint a manu de intro sunt pagos e nudda”, narat disanimadu. Cussos pagos, magare, lu faghent ca “cussa die b’at tempus malu in mare”, e agiunghet “Aia disigiadu unu fuste màgicu pro podere faghere a bidere it’est a beru sa Sardigna”.

Òschiri est a 45 miglias dae sa Costa Smeralda (su tretu de costa connotu in su mundu intreu pro sas renas arvas suas, pro sas rebotas chena pasu e pro sa clientela glamour chi b’andat) est una bidda posta in su coro de s’internu a nord. Ma su essere a curtzu, custos duos logos, est su chi ant a cumone ebbia. Si una die de sos VIP est fata de ispumantes bonos, caviale e yacht, sa die prus nòdida, faeddende de turismu, de Oschiri est sa Sagra de sa Panada, una festa dedicada a una turta de petza de porcu dìliga e bona (in inglesu pork pie), e acumpangiada dae mùsica, cantos e ballos sardos. Unu aposentu de unu hotel ismeraldinu podet torrare postos de traballu meda, ma in sa leada de sa provìntzia de Terranoa – Tèmpiu, in su mentres, sa disocupatzione est pigada a su 17%, cando in su 2012 fiat a su 13%. Sa Costa, a onni manera ispinghet meda s’economia locale.

Como non est chi sos sardos si dispragant de non faghere rebotas cun giogadores de fùbalu e cun gente de sos reality show. Sa Costa Smeralda, tzertu, ponet sa Sardigna in sa carta de su turismu internatzionale ma est una làstima chi su benefìtziu non lee-de prus logos – mescamente in s’internu, pro como pagu connotu e bisitadu e chi imbetze mantenet sa cultura sarda in manera forte.

“Su logu a manu de intro est su coro de s’ìsula, ca inoghe est mere su chi nos distinghet e chi nos faghet ùnicos”, narat Roberto Carta, 38 annos, oschiresu chi traballat in su Comune. “Totu su patrimòniu culturale, linguìsticu, mùsicale – chi est ricu meda – est istadu bene mantesu  dae sas biddas de s’internu, in sas tzitades est prus ocasione pro faghere folclore ma inoghe sa cosa est sentida a beru e est cosa fitiana”. Sètzidu in unu bar, postu a ogros a una crèsia inghiriada de tantas prammas,  si firmat pro arresonare in sardu cun unu chi fiat colende, in sa limba chi prus de totu impitat in sa bidda (“Cun totu custa gente bi faeddo in sardu, non bi diat resessire a bi faeddare s’italianu. Diat essere cosa istramba” narat). Carta contivigiat unu blog, iscriet prus a totu de Sardigna, e propriu in custu giassu at fatu a cumprendere s’infadu suo pro sa cantzone de Mogol. “Est pagu funguda e non est dìliga, non narat nudda de su fungudumine de sa Sardigna”, narat. Deretu crarit chi s’autore non podet essere acusadu de carchi cosa, faghet su suo. Custa, prus che àteru, est un’idea de turismu “chi non torrat sa mannària de sa Sardigna” e chi como tocat de lassare in caminu.

In medas ant pensadu chi custu passàgiu fiat istadu de faghere dae annos, como chi s’economia sarda est collende sos pabireddos s’arresonu est istadu prus apretadu. S’Istat nos narat chi sa disocupatzione in Sardigna, in su cumprire s’annu passadu, fiat prus arta de su 18%,  unu de sos peus datos de Itàlia. Prus de su mesu de sas famìllias decrarat chi sas risorsas econòmicas sunt pagas o chi non bastant propriu.

Sa bidda de Oschiri, a diferèntzia de àteras non at sufertu meda sa crisi a su cumintzu, ma como, màssimu pro sa crisi de edilìtzia, est cumintzende a la serare e non pagu, narat su sindigu Piero Sircana. In su 2010, at naradu, “su Comune at bandidu carchi postu de traballu pro disocupados. B’aiat bisòngiu de 5-6 operajos e fateint sa pregunta 10-12. Sa borta posca l’ant fata in 40, e s’ùrtima in 100. Si diamus faghere unu bandu como fàtzile a lompere a sas 200 o 300 preguntas”, narat.

S’àteru arresonu malu est chi, sigomente ca pagu traballu, sos giòvanos si nch’andant. Sircana l’ischit bene: ambos sos fìgios suos, de binti annos, sunt andados a Milano pro istudiare e traballare. Su caminu demogràficu est malu a beru, Oschiri falat de abitantes dae su 1950 e como nde contat 3.400 ebbia.

In custu momentu creschet su disìgiu de una manna, atrivida e noa proa turìstica culturale  chi potat agiuare a creschere sas leadas de s’ìsula sa prus postas male, faghende naschere traballu e animende sas impresas. “Devimus puntare in sas cosas nòdidas de custas leadas de s’internu”, narat Sircana. “Sa Regione nos diat devere agiuare a promovere su genius loci”. Pro sa Sagra de sa Panada de sabadu a Òschiri isetant belle 10.000 persones , una manera pro crarire, narant sos oschiresos, comente sa cultura de su logu podet brotare economia. “Una manifestatzione chi magare at a batire bisitadores meda e balàngios cantu si nde diat faghere in unu mese intreu”, narat Carta.

Dalila Dejua, 31 annos, e sa mama, Filippa Langiu, 62, isperant chi sa gente aprodet gasi a trumas. Traballant meda meda, onni die, in sa butega de panadas chi mandant a dae in antis in famìllia. “Sa Tentatzione”, e sunt aprontende 7-8.000 panadas fatas a manu pro sa gente chi at a bennere.  Dejua narat chi sa Sagra est importante pro sas impresas de su logu ma finas pro su turista chi gasi at manera de connoschere “su chi est unu de sos logos mègius de sa Sardigna”. “Comente in Costa Smeralda, chi non est pro a nois”, ispiegat, riende·si·la, inoghe c’at cosa meda de bidere. Subra a custu Giorgio Pala diat essere de acordu chena mancare.  Apassionadu de archeologia est gasi amantiosu de su logu suo chi est a cantu a istare male in su mentres chi esaltat – leende ànimu – sas cosas nòdidas: dae sa bellesa de sa limba (“cando si faeddat in sardu si narant cosas chi faghent su coro a cantos”) a su “Museu suta su chelu” de sas ruinas prus antigas. “Semus sètzidos in unu siddadu, ma non faghimus mancu su mìnimu. Non resessimus a narrere: abbaida it’amus inoghe!” narat. “Si fìamus istados a s’artesa, so seguru, chi totu sos 1,6 milliones de sardos fiant istados ricos, non gente chi istat bene. Ricos!”

Annunci

2 pensieri su “The Guardian: «A pagu tretu dae sa “costa cun caviale” sa Sardigna sa prus ‘vera’ cantat sa cantzone trista de su chi non s’est fatu mai»

  1. Pingback: Facebook, Twitter, Blog: in scena ‘Sardegna on line’ (e i post della settimana) | Roberto Carta

  2. Pingback: Sos post prus lèghidos de su 2014 (iscritos in sardu) | Roberto Carta

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...