Limba, poesia e cantu a tenore (Montanaru cantadu dae su Tenore San Gavino de Onieri)

Sos giòvanos de como a Montanaru non bi lu connoschent e si lu connoschent est ca lu cantant a tenore. Montanaru est s’aprovèrgiu de Antioco Casula, desulesu, poete chi sa vena brotadu l’at dae su finire s’Otighentos pro che lòmpere a sa prima meidade de su Noighentos. Bi seramus nuscu de Europa, dae Zola a Tolstoj, dae Dostoevskij a Gor’kij, chena ismentigare Carducci e Sebastiano Satta. Poete de «versos rebellos», impinnadu, identitàriu, atentzionadu a sa limba sarda tantu chi detzideit de isponnere sa poesia lìrica italiana. Atentu a su mundu, ma de un’atentzione chi pro a isse si podiat contare in limba sarda ebbia.

B’at una poesia de Montanaru chi totu sos chi s’ispàssiant cun su cantu a tenore connoschent: Tiu Bobore Mannu.
Est una poesia ma est unu contu a su matessi tempus, unu contadu bellu cantu e comente una paristòria, in ue b’at balentia bona e solennidade, su chi si narat èpica. Padrona de sa poesia est sa figura de su babbu. Unu babbu chi est mannu, Bobore, e chi contat sa vida a sua sos fìgios. Una vida de tribulias e anneos, cun unu babbu mortu pro una vindita e cun sa vindita galu de torrare. Sa gioventura barigada meledende e istelevrende comente ochìere su nemigu paris cun s’oriolu de su traballu e de sa famìllia de mandare a dae in antis. Finas a cando, pròpiu in su momentu chi fiat a cantu a ispèrdere unu de sa genia nemiga, bi sutzedet una cosa curiosa…

Non est de sas mègius poesias de Montanaru ma at una tzerta resèssida si benit cantada a tenore, màssimu comente faghet su Tenore San Gavino de Onieri chi nos la cantat in antis a istèrrida e posca giogada cun sa moda de sa dantza onieresa. Ambas duas modas agiuant a iscurtare e cumprèndere bene su testu, non si perdet peruna paràula e perunu versu sueradu a ticu a ticu  dae Montanaru. Sa boghe Francesco Pirisi, una de sas prus connotas e mentovadas de Sardigna, isterret paràulas, versos e rimas leende semper su puntu giustu pro s’intrada de su tenore de Giovanni Pirisi (contra) Raimondo Pidia (bassu) e Carmelo Pirisi (mesu boghe).

In custa cantada essit a fora, pro s’origra atenta o pro cussa chi si lassat tragiare dae sa màgia, totu su fungudu-mine e sas pìgias de su cantu a tenore: sa boghe a s’onieresa, de nare e de gùturu su giustu, leat su puntu in sa mègius manera e faghet semper intrare su tenore in sa nota sua. E custu l’amus nadu. Ma b’est su timbru, b’est su volume, b’est sa melodia e ligat cun su tenore: b’est totu, est una bella boghe a beru. Su bassu si presentat un’otava suta da boghe. Sa contra, imbetze, si nche ponet in mesu a s’acordu, una cuinta subra de su bassu e una cuarta suta de sa boghe (raju, cantu semus pretzisos!), cumandat e donat armonia paris. Sa mesu boghe, belle semper una tertza subra de sa boghe, frorit su cuncordu cun banzigos e inghìrios. Ispantu mannu e coro prenu de mele.

Francesco Pirisi acollit s’ànima de Montanaru, pesat artu e abbassat sa boghe a segunda de sa paràula, de su versu e de su momentu de su contu. A iscutas paret a beru Tiu Bobore mannu contende·nos sos trìbulos colados. B’at unu passàgiu, cando est già intrada sa dantza, chi est de iscurtare, custos sunt sos versos:

Giuanne, su prus malu de s’ereu,
Cuntentu iscannaiat unu anzone
E deo l’aboghineit: mira atentzione!
Oe giompet sos annos babbu meu!

Fatu fatu s’àteru versu,

Giuanne cun sos àteros pastores,
Intendende sa forte boghe mia,
Si peseint che canes cun fùria
Ma cun sa cara de milli colores.

Non naro ateru, custu est su link a su videu cun sas paràulas de su testu subra iscritas (iscritas a cudda manera ma…). Abbaidedade e iscurtade. Sa poesia, finas connotta comente “Sa vindita, s’amore, su perdonu”, benit tancada cun una isterrida chi faghet mancare s’alenu. Custu videu, in youtube, est istadu abbaidadu pru de 60.000 bortas, iscusade si est pagu.

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...