Sereno Variabile nos contat de Cabras intre esotismu e auto-esotismu (galu?)

Un’amiga, a matzoninu, m’at aporridu de abbaidare in streaming sa puntada de eris de “Sereno Variabile” (punghe inoghe pro la bidere) e dedicada a sa bidda de Cabras e a sos siddados suos: istagnu, pisca, botarga, binu, Tharros, Santu Sarvadore, Gigantes de Monte ‘e Prama, sa traditzionale cursa de sos iscurtzos, su ballu sardu cun sos òmines chi in su mentres chi ballant mantenent in conca una tatza prena de vernatza. E non est pagu, Cabras est una de cussas biddas chi prus pinturat s’Ìsula intrea: mare bellu, pisca e produtos bonos, vernatza dìliga, traditzione sentida e contivigiada comente costume de como e non comente folclore, siddados archeològicos in campu nuràgicu (sos Gigantes), fenìtziu (Tharros), romanu (torra Tharros). Est sa bidda de s’iscritora Michela Murgia e de su giornalista Mario Sechi.

Sa puntada cumintzat e unu Osvaldo Bevilacqua trucadu che caratza nos presentat tres acumpangiadores: una biologa marina, unu giornalista de sa Nuova Sardegna, una femina chi contivigiat s’animatzione turìstica de su logu. Su chi si bidet est bellu a beru, immàgines chi faeddant a bonu issoro. Si bogamus s’idea de renas de mare agrestes de sa biologa (ma it’at a chèrrere narrere custu “agrestes”? Forsis at lèghidu meda Gràtzia Deledda…), sa puntada curret in paris fina a lòmpere su momentu de su ballu sardu finas si, a la narrere tota, cheret marcadu chi sos acumpangiadores seberados, a bellu a bellu, non si bident prus.

Fatu su ballu, comente pro una maia, su Bevilacqua nostru bogat a pitzu su disìgiu chi dae semper si papat s’ograda istrangia chi isperiat sa Sardigna. Cumintzat una ispètzie de intervista chi de a beru faghet a riere sas puddas, preguntas fatas pro nche tirare totu su esotismu de nois àteros e pro imbitzare torradas de cabu auto-esoticas (un’ammisturu intre sa peus Gràtzia Deledda e su mègius Benito Urgu). Su matessi balet pro sas preguntas fatas a su maistru de istrumentos musicales, presentadu comente un’artista curioseddu chi magare intro de note si “sentit” e essit a brotare istrumentos, e non comente unu traballadore cale si siat, emmo nòdidu, ma normale. Non podiat posca mancare sa preguntedda a “Ramon” (aprovèrgiu de unu), su personàgiu curiosu de turnu, chi at leadu custu nòmine dae sos tempos de sos ispaghitos western de Santu Sarvadore. Pare chi faghiat semper sa parte de su banchieri. Non m’ismèntigo de sas segnoras chi bestidas de tùnicas antigas faghent assagiare pratos bonos a sos turistas presentes in Tharros (s’ùrtima borta chi bi so istadu, tres annos faghet, custu servìtziu turìsticu non bi l’apo connotu, magare est istadu pesadu giustu pro sa trasmissione de Bevilacqua, non nd’isco). Un’ispètzie de essu “marinu” de su “montagninu” bustu cun sos pastores: tota sa Sardigna est bidda. Bi mancaiat isceti su mamutzone e tando fìamus istados a caddu.

Su chi penso deo est custu. Bellas sas ripresas, sas immàgines e sos temas tratados. Mala e metzana s’idea narrativa de Bevilacqua. Pro unu contu trash e pulp (chena risu e chena violèntzia) cun custu essu, mègius isceti sas immàgines. Sighit a abarrare s’idea de faeddare de sos sardos comente cosa de riere, a unu tzertu puntu si devet pro fortza riere, lu fatat sa Rai s’arresonu o lu fatant sas acadèmias de comunicatzione e marketing de Milanu, si finit semper a torrare in risu s’essèntzia dìliga de sa cultura nostra prus funguda. Cultura chi abbàidat, cussa italiana, chi oramai est issa a risu de totus, chi non s’est abigiada de essere colada a cultura abbaidada (dae su mundu intreu, chi si faghet matas de risu e de gosu). Unu servìtziu in cunforma a s’italianu mèdiu (e magare finas a su sardu mèdiu) chi càstiat sa televisione, cussu italianu chi a parre de Bernabei at sa capatzidade de cumprendere de unu piseddutzu de prima media e chi pro Berlusconi màssimu est de tertza media.

Si nche bogamus sas ripresas e sas immàgines, custu servìtziu est cantu prus ponet a conca in giosso un’idea comente si tocat de cultura e de turismu. Pro narrere: ais bidu mai servìtzios comente custu marcados de esotismu cando si faeddat, ite nd’isco, de su Pàliu de Siena e de sos contradaiolos? Naro chi nono. Penitenziagite. Penso imbetze chi Cabras siat una de sas biddas prus bellas e simbòlicas de sa Sardigna intrea. Creo chi meresset ateruna narratzione, rica de milli pìgias fungudas, nono una paristòria de nudda in ue si proat a faghere a riere cun su contu de s’òmine sardu chi istat tota die bufende vernatza e chi si presentat a contivigiare una femina cun una tatza de binu in conca. Ajò, da! Custa non est ironia sana, ma una chirca metzana de su mitu de s’òmine areste chi galu andat a caddu a su burricu (mi, s’àinu non bi fiat, ispantu). Bos racumando una cosa, sa Sardigna est fata de gente normale, non bos isete-das de che agatare martzianos o àteros personàgios curiosos chi girant a de die e a de note cun una tatza de binu in conca ca non est gasi. Bevilacqua est resèssidu a faghere colare comente risu esòticu una proa atrivida, una balentia, ischire ballare cun una tatza de binu in conca: firmu, seguru, in echilìbriu. Pagu bastat, una muda mìnima de s’ograda e brincamus dae sos isteddos a sas istallas. Pòveros gigantes de Monte ‘e Prama, agiumai mancu mentovados e leados pròpiu a pagu contu.

Annunci

2 pensieri su “Sereno Variabile nos contat de Cabras intre esotismu e auto-esotismu (galu?)

  1. Pingback: Sos post prus lèghidos de su 2014 (iscritos in sardu) | Roberto Carta

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...