E cantu bos praxit «Su Jazz»! E forsis finas «Su Blues», ma «Su Rock»?

Foto leada dae sa retza

Apo lèghidu cun pràghere s’arresonada in facebook pesada dae Omar Onnis Deidda in fatu de «polìtica» e «pianificatzione» musicale in Sardigna. «Su Jazz», a cantu paret, la faghet de mere: buscat prus dinare de cale si siat àtera moda musicale; faghet sos fèstival sos prus mannos: Sant’Anna Arresi, Belchidda, Tàtari, Casteddu, Gonone, Lungoni; at sos artistas sardos prus mentovados e famados: Pàulu Fresu, Gavino Murgia, Enzo Favata, Pàulu Angeli, Antonello Salis; at prus visibilidade e istràngiat cun fatzilidade in onni cobertina patinada italiana e sarda; est apretziadu, e meda, dae cussu mundu polìticu a curtzu a sa manca veltroniana e renziana; binchet onni annu su primu prèmiu de su mundu musicale «polìticamente curretu» 😉 (segundu sa moda italiana). E d’àtera parte chie non b’andat a «Su Jazz»? B’acudint totus sos chi s’intendent bellos, galanos, abbistos, dìligos, de bona cultura e biagiadores. B’aprodant sos chi ispàgiant de connòschere onni pìgia de su mundu cantu est mannu e sos chi cherent pònnere fatu a sa sotziedade chi contat. A fine istiu podent narrere: «Deo so istada in su Jazz, in Belchidda, e apo bidu a Pàulu Fresu chi istaiat in mesu a sa gente, Gavino Murgia chi si la coreddaiat, Pàulu Angeli chi sonaiat sa chiterra sua cun una truma de artistas de istradone, Enzo Favata chi si pipaiat su zigarru e Antonello Salis istèrridu subra de su pianu forte suo». Bete meledu! Ite vida cussa de su jazzista sardu: in mesu a sa gente e in mesu a su mundu, intervistadu dae sa pàgina culturale de La Nuova Sardegna (in cue su «politicamente curretu patinadu» b’est nàschidu, pàschidu e fatu mannu), dae s’imbiadu de L’Unione Sarda (giai l’ischides, in Casteddu «Su Jazz» est de moda e dae paritzu tempus, una moda chi non morit mai), dae su free lance chi a s’indonu iscriet pro Repubblica (su «costume» Repubblica lu contat segundu curiosas maneras veltronianas-renzianas, una bia de mesu intre Gianni Vattimo e Roberto Benigni). Una còpia de annos faghet, in Gavoi, prima die de su festival lìterariu, cuntzerte-ddu musicale. A unu tzertu puntu si intendet su sonu de una trumba e sa gente cumintzat a tzocos de manos e a ìnnigros, comente chi sa trumba potzat èssere un’ispètzie de guru-foghile nou. E oramai non contat chie la sonat, contat isceti chi siat trumba. Leadu dae trumba pròpiu pro narrere de custu, pro contare de sa monta e pro essere impitadu isceti pro custu. D’àtera parte in campu musicale si narat trumbitare e non trumbare. «Mi l’apo trumbada, mi’, la devias bidere…», «Una trumbadedda a nos la faghimus, ite naras?». Sa trumba, tando, in custu mundu nostru est finas sìmbulu “fallicu”, est potèntzia, est dinari. «Pàulu Fresu est una machina pro faghere dinari. Benit, sonat 20 minutos, si ponet in butzaca su dinare e lestru lestru si nd’andat». Cantas bias amus intesu custu arresonu?

Foto leada dae sa retza

Si est beru chi istampa e media non dassant logu meda a sa mùsica in generale custa cosa non est bera pro «Su Jazz», nono. De «Su Jazz» sos giornales nde prenant pàginas de cultura e de ispetàculu, bendent sos cd, faghent publitzidade meda e pro custa atividade incassant dinare ateretantu. In parte sutzedit ca est bella mùsica (proite nono), in parte est moda (pro su mundu burghesu e pro su mundu chi cheret èssere comente a sos burghesos), ma est finas passione (in Sardigna amus cultores de mùsica jazz a beru bravos, chi si sighint totu sos fèstival sardos e andant finas a bìdere àteros fèstival comente Ùmbria Jazz), o, galu, est gana de istare in un’ambiente nòdidu, cun bella gente e cun sos amigos connotos in ie in tantos annos de partetzipatzione (deo connosco bene su casu belchiddesu e sa cosa, pro meda, est gasi. Finas pro a mie).

Foto leada dae sa retza

A onni manera, su MiBACT (Ministeru de sos benes e de sas atividades culturales e de su turismu) pro s’annu 2015 at a agiuare su jazz italianu cun unu fundu istraordinàriu (chi un’incràs s’at a mantènnere pro semper). Custu fundu non est mannu meda: 500.000 èuros. Tando, finas si est totu bellu su chi bos apo contadu in antis, narade·mi una cosa: proite si su ministeru italianu, pro tota s’Itàlia, ponet a cùrrere isceti 500.000 èuros, sa Sardigna a sa sola, imbetze, pro sas primas chimbe manifestatziones de mùsica jazz finantziadas investit (2014):

1) € 125.181,00 (XXXII Fèstival Internatzionale Jazz in Sardigna – EJE 2014)
2) € 89.594,00 (Sòtziu Culturale Jana Project – Fèstival de Lungoni – Santa Teresa de Gaddura)
3) € 118.207,00 (Cun in mesu su Fèstival Calagonone Jazz 2014 27^ editzione )
4) € 106.749,00 (Sant’Anna Arresi)
5) € 104.736,00 (Time in Jazz)

Semus faeddende de: € 504.467,00.

Como siat crara una cosa: a mie sos fèstival jazz praghent e mi agradat finas carchi moda musicale jazz, non totas ma calicuna emmo. Custu pro nàrrere chi de seguru non so contra a custu mundu. Prus che àteru mi pregunto comente nascat custu protzessu chi in sos annos at giutu «Su Jazz» a èssere aproendadu prus dae sa Regione Sarda in Sardigna chi dae su Ministeru in Itàlia.
Custa cosa non podet èssere ispiegada isceti cun sa moda, naro chi nono. Cheret nàrrere chi, nessi in arresonu de fèstival, custos artistas famados ant postu in campu finas abbistesa organizativa, polìtica, mediàtica. Sunt istados artistas e manager a su matessi tempus. Ma sunt finas istados bravos a pesare calicunu, magare finas giòvanu e finas sardu, a curtzu a issos, chi in cabu a s’annu lis faghet su traballu prus cuadu. Chi non est a èssere maniales, no, est a èssere capatzos a contivigiare addòbios de importu.
Como, mi pregunto, a parte sos teatros e sas cumpangias de ispetàculos prus mannas chi amus in Sardigna, sos àteros sugetos chi pedint o nono dinare a sa Regione ant fatu a bìdere sa matessi professionalidade artìstica, organizativa, mediàtica de su Time in Jazz? (Giustu pro nde nàrrere unu).
Tando si est beru chi sa Regione Sarda diat dèvere premiare sos artistas suos bravos a sonare e fàghere in campu jazz, est finas beru chi sa Regione Sarda diat dèvere premiare sos artistas sardos bravos in àteras genias musicale e finas cussos nòdidos in sa cultura musicale sarda. Apo bidu chi de custos calicunu s’est betadu e at àpidu finamentas bonos finantziamentos (su Tenore de Neoneli € 44.181,00 , Piero Marras € 39.015,00, Bertas 26.742,00).
Posca de «Su Jazz», de sa «Lirica», de sas istòricas «Cumpangias de teatru» benint realidades sardas minoreddas e fatu fatu finas sa mùsica blues. Su rock non b’est belle in nudda. Proite? Non l’isco, forsis chie in Sardigna si bi impignat non est lòmpidu a una professionalidade prus presente in sas àteras genias musicales. Forsis sa comunidade sarda chi si interessat de rock non est a beru comunidade o galu non lu est.

Paolo Angeli – Foto leada dae sa retza

Ateruna duda chi mi benit est custa: ma si de a beru «Su Jazz» est gasi dìligu, galanu e at custa capatzidade de fàghere mòvere gente a fiotu, proite tando at su bisòngiu de totu custu dinare pùblicu regionale? Semus seguros chi si sa Regione aiat aproendadu de totu cussu dinare 4-5 fèstival de mùsica sarda sa resèssida de custos eventos non fiat istada sa matessi? Ca proite «Su Jazz» est de moda, emmo, ma est una moda semper elitària. Cantos sunt sos sardos chi in cabu a s’annu iscurtant mùsica jazz? Una parte minore de sos sardos, giustu? Tando su dinare chi si ponet a cùrrere pro su «Deus Jazz» si fiat pòdidu investire finas pro àteras genias de mùsica elitària, o non? Deo creo chi bravos artistas/manager de «Su Jazz» ant ischidu imbucare su caminu in antis meda de àteros, apant pesadu bonas professionalidades e s’apant fatu marcadu (finas polìticu) e pùblicu (renzianu-veltronianu ma finas sintzeru). Tocat a sos àteros como a si fàghere logu, professionalidade, marcadu. Tzertu sa Regione Sarda, màssimu como chi est un’ateneocratzia renziana cun istriadas veltronianas, at a prefèrrere semper «Su Jazz» e s’artista patinadu chi agradat a Repubblica a cale si siat àtera proposta prus pagu cool. Ma b’est s’Unione Europea, b’at bandos europeos chi diant pòdere dare finas prus dinare de su chi est s’istantziamentu regionale. Est chi tocat de fàghere progetos transnatzionales, a cumone cun àteros sòtzios de nessi tres istados europeos. E proite nono? Si est a bi pensare  a beru su siddadu de internatzionalidade prus mannu l’amus in sa limba, cussa sarda: semus una minoria linguìstica reconnota e nos podet bènnere in falada a fàghere progetos transnatzionales a partire pròpiu dae custa calidade e ponende·nos impare cun àteros logos de bilinguismu: Còrsica (e giai est a curtzu), Catalugna o Bascos (E non mi parent prus a tesu meda de Trieste), Irlanda (Est a tesu, emmo, ma giai nde balet sa pena), Iscòtzia (finas pro issa nde balet sa pena), Olanda (Est in intro s’Europa continentale, malos mi’, comente sos tedescos, ma b’ant multi-linguìsmu). E chena pònnere a banda Trentinu e Friuli. E si si resesset a assotziare de prus e mègius de como limba de su logu e fèstival chi nos faeddant de sa word music, magare resessimus finas a fàghere intèndere protagonistas sos chi in su logu de su fèstival b’istant totu s’annu. Ca, in sa Sardigna de a manu de intro, s’arriscu mannu est de fàghere fèstival mannos chi acuntentant sos istudiantes o istudiados chi torrant pro s’istiu, sos bisitadores, carchi cummertziante e/o albergadore. Ma sa gente tota? Cussa creschet de a beru si su fèstival mannu li ruet in conca chena mèdiu perunu cun sa limba e sa cultura sua? Nde semus seguros? In s’iscola sarda s’est fatu custu traballu, ant dissarditzadu s’educatzione, sos resurtados sunt chi amus sa peus iscola de Itàlia e duncas de Europa. Deo creo chi sas cosas siant presas bene: dissardizatzione e abbandonu iscolàsticu. Bidu chi su dinare lu bogat sa Regione forsi est mègius chi finamentas sos fèstival, finas sos de «Su Jazz», non siant tropu dissardizados. In medas mi podent narrere: ma cussos a caddu de sa Regione sunt sos primos a èssere dissardizados e a chèrrere sa dissardizatzione! Deo naro: magare non totu, e si est gasi los devimus cumbìnchere chi est ora de li bogare de cabu cun sa dissardizatzione. Si non como cando?

Duncas, giovanos artistas e giovanos organizadores, oe tocat de èssere atrividos, isperiare a tesu e pensare in mannu. Cherides èssere comente a Pàulu Fresu? Tando non bos pranghedas tropu subra, traballade in onni manera e faghide·bos·nde!

Annunci

2 pensieri su “E cantu bos praxit «Su Jazz»! E forsis finas «Su Blues», ma «Su Rock»?

  1. sotziu

    De fronte a custas cosas,a sos chi aberu s’intenden sardos ligados a sas beras traditziones e cultura nostra creo chi che lis pighet su sambene a chelveddos. Sa cosa pius importante de sa nostra cultura e traditziones, sa gara ‘e poesia improvisada chi nos at intregadu poetas comente a Remundu Piras,Antoni Cubeddu,Barore Tucone,Barore Sassu,Peppe Sotzu, Piredda e ateros meda,sa chi at mantesu ‘ia sa limba sarda, sa chi at amajadu babbos e jaios nostros cun Argumentos de importu, e cun estru diligu e profundu, chi no at eguales in peruna parte de su mundu,ch’est bogada fora dae cada atzudu de sa regione romana de Casteddu,iscartada dae televisiones e giornales sardos, olvidada dae sos chi finas a oe si sun fetende paladinos de sa limba sarda,una ‘ilrgonza. Si oe sos chi in sa Regione si faghen jamare soberanistas sighin a fagher finta de nudda, nos abarrat de fagher una cosa ebbia: piangher e pedire iscuja a sos chi nos aian fatu connoscher sa bellesa e galania de sas cosas nostras, pro las bider gai morinde sena dolu perunu.

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...