Arratza de chida linguìstica! Finas ca chena limbas non si faghet turismu internatzionale

Sas novidades «linguìsticas» de sa chida colada:

  • nominada, e giai fiat ora, sa diretora noa de su Servìtziu Limba Sarda de sa Regione Sardigna, est Maria Isabella Piga, dirigente regionale laureada in matemàtica;
  • su presidente Pigliaru intervistadu dae Radiolina at naradu:«Sa Lsc est in cue, esistit e at a sighire a fàghere su chi pro a issa narat sa lege»;
  • s’Unione Sarda at aprontadu unu sondagiu gasi intituladu: «Pensades chi sa Regione diat dèvere torrare a finantziare sos cursos in limba sarda in sas iscolas?»;
  • su Sòtziu Aziru at aparitzadu una manifestatzione pro sa limba sarda in sas iscolas (e contra a su mancadu finantziamentu de sa Regione) su 28 de Sant’Andria. Sunt acudidos finas su Coordinamentu pro su Sardu Ufitziale, A Manca pro s’indipendèntzia, Scida giovanus indipendentistas, Sardigna Natzione.
  • sa Fundatzione Sardinia, semper su 28, at contivigiadu un’addòbiu subra de sa “Ratifica della Carta Europea delle lingue regionali o minoritarie e nuove linee di politica linguistica in Sardegna”;
  • s’Amministratzione comunale de Casteddu at postu a cùrrere un’istantziamentu de 2 milliones de èuros pro sas iscolas maternas pùblicas de sa tzitade, dinari chi podet èssere impreados finas pro sa limba sarda;

Naramus sa veridade, gasi pagas non sunt. Cun su podere – cussa de sa Fundatzione Sardinia – e contra a su podere – cussa de su Sòtziu Aziru (subra de calicuna apo giai iscritu – Est una «matemàtica» sa diretora de sa limba sarda. Bi creides emmo o nono? e Discussionismo = Lanivuzu…ahi ahi Fundatzione Sardinia – subra de àteras at iscritu LimbaSarda2.0 – Su ‘diversivu’ de sa Carta Europea, mentres Casteddu ponet duos miliones e ‘Sa LSC abbarrat’. Pigliaru iscuntentat sos talebanos (pro timòria de Soru).

M’at fatu dolu a lèghere carchi cummentu in su sundagiu de s’Unione Sarda, màssimu in sa pàgina facebook. Tzertu, su prus mi sunt passitos in favore de su sardu in sas iscolas, ma b’at galu una parte de sardos chi non cumprendet proite ite est importante istudiare sa limba sarda. «Mègius s’inglesu» iscrient su prus de custos, ca est sa limba de su mundu, sa limba pro retzire su turista, su trastu pro agatare traballu in Europa.

Chi s’inglesu siat importante non lu negat niunu, bi diat mancare, difatis benit giai insigiadu (e male) dae s’iscola italiana. Àteru arresonu est cussu de su turismu. Tando, in Sardigna faghimus 3.000.000 de turistas s’annu, una misèria. Los faghet una tzitade comente Siena (56.000 abitantes) a sa sola, pensade unu pagu. Sas Canàrias lompent a 12.000.000 de turistas s’annu. In prus tocat de agiùnghere chi su turismu nostru no est «internatzionale» ma pro su prus «italianu».

Pro fàghere turismu internatzionale e propònnere carchi cosa de «universale», chi balet in totue, e chi potzat fàghere acudire turistas americanos, tzinesos, giaponesos, bi cheret inglesu (pro los retzire e los fàghere istare bene) ma bi cheret finas una sensibilidade, una connoschèntzia de su logu sardu e una capatzidade de lu «contare» chi non podent nàschere dae s’italianu iscolàsticu e dae s’iscola pensada in limba italiana. «Corte Apertas» praghent a totu in Sardigna, beru? B’acudit gente dae Casteddu e dae Tàtari, dae Aristanis e dae Olbia-Terranoa, dae Tèmpiu e dae Iglesias, dae Tortolì e dae S’Alighera. Ma pro bois, si in custos logos non si fiat galu faeddadu su sardu, sas «Cortes Apertas» las aimus agatadas? Totu su chi bi bidides e chi bos praghet, dae sos nuscos a sos gustos, dae su cumprire a s’istrangiare, est totu cosa chi naschet dae sas intragnas de sa limba sarda. Non bi cheret sa cherbeddera de Mazzini a lu cumprende, raju.

A sa classe polìtica su còmpitu de educare sa gente sarda, de fàghere a cumprèndere chi non podet esìstere Sardigna chena limba sarda. Unu turista internatzionale non diat àere praghere de bènnere a inoghe a bìdere e intèndere unu sardu chi istrogat un’italianu. In custu mundu glocal, in su turismu nessi, su chi pagat est sa «diferèntzia»,  de seguru non pagat a èssere pretzisos a totus sos àteros (ca tando unu at a seberare semper sos sartos toscanos e non sa Sardigna a manu de intro). In Sardigna, paris cun su patrimòniu naturalìsticu, su chi marcat custa «diferèntzia» est sa limba, ca est dae issa chi naschet su patrimòniu culturale, àgiu nd’ais de apeddare. Non b’at peus macu de chie non cheret cumprendere.

P.S. Inoghe bos pongo unu pensamentu de Davide Mulas – A sos chi “su dinare pro su sardu est a l’isperditziare” – publicadu in facebook e in Limba Sarda2.0. Unu cunfrontu intre sardos e catalanos.

Annunci

Un pensiero su “Arratza de chida linguìstica! Finas ca chena limbas non si faghet turismu internatzionale

  1. Pingback: Sos post prus lèghidos de su 2014 (iscritos in sardu) | Roberto Carta

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...