Sos soberanistas dormint e Renzi bassu bassu mutzat s’autonomia a Regione e Comunes

Unu devet èssere tzegu pàbaru a non lu bìdere. Prus s’andat a dae in antis e prus su Guvernu Renzi si nche càbulat pro colare a s’istòria comente su Guvernu chi prus at a nòghere a sa Sardigna e a sos sardos. S’arresonu de sas intradas intre Istadu e Regione no at àpidu isboligos, s’autonomia ispetziale de sa Regione sarda arriscat meda ca proite, a pàrrere de sos masellajos de su Guvernu (e de giornalistas comente Rizzo), sa Sardigna non la mèritat. Ma cale Sardigna? Cussa chi istrogat sa genia dirigente italiana? O sa Sardigna prus vera de sa gente cale si siat? O non la mèritat s’istòria sarda chi de seguru nen Renzi nen Padoan nen Rizzo connoschent?

A onni manera, a parte custu, su chi pro sa prima borta s’est giughende a mòrrere est su mundu de sos comunes, màssimu sos comunes de s’internu. In giru de chimbe annos sos comunes ant pèrdidu belle totu su chi s’Istadu in antis lis passaiat (unu Comune de 3.500 abitantes at pèrdidu prus de una mesa millionada de èuros, nessi su 15-20% de su bilàntziu de 4 annos faghet). A custu tocat de agiunghere: unu patu de istabilidade chi firmat paritzas risorsas pro belle totu s’annu, su ricatu de fàghere pònnere e posca incassiare sas tassas a lùmine de su Comune (ma detzisas dae s’Istadu). In sas ùrtimas oras est brincada finas s’esentzione pro s’IMU subra de sos terrinos agrìculos e in presse in presse pastores e operadores agrìculos l’ant a dèvere pagare intro su 16 de Nadale.

A cussos Comunes chi no ant risorsas in foras de cussas ordinàrias, comente podent èssere s’eolicu o sas segundas domos in logu de mare, l’at a tocare sa sorte de mantènnere un’Amministratzione giustu pro aprontare su pranu sòtziu assistèntziale (chena dinari però) e mantennere sos dipendentes, s’ordinàriu. Cheret naradu adiosu a sa manutentzione de sos immòbiles comunales, a sa pulitzia de su logu e a su birde pùblicu e finas a sas òperas mannitas (ca sos Comunes no ant a àere su tempus o sa càssia pro las fàghere), a sos addòbios nòdidos (comente sagras, cortes abertas), a mantènnere ritzos sos sòtzios culturales o de voluntariosos. Ma cheret finas nàrrere chi s’at a lassare a bonu suo e pro semper s’ambiente e finamentas sos logos de cultura de sa Sardigna posta a manu de intro. Una Waterloo chi nos nd’amus a lìnghere sos pòddighes.

A cussu puntu, a pàrrere bostru, a unu l’at a intrare bògia de si candidare a Sìndigu? Naro chi nono, sas biddas nostras ant a torrare biddas cummissariadas, comente a sos tempos de su Podestà, ghiadas dae unu cummissàriu guvernativu. E sos soberanistas ite nde narant? Comente defensant sos comunes dèbiles chi no ant mare e no ant eolicu? O sa Giunta Regionale leat positzione e si ponet s’oriolu de defensare custos Comunes e sa gente issoro o pro sa Sardigna de intro at a bènnere unu tempus chi mancu sos romanos l’ant fatu connoschere.

Sa pregunta est semper cussa de in antis: in cara a su Guvernu italianu prus tzentralista e prus malu de s’Istòria ùrtima, sos soberanistas in Giunta ite narant e ite pensant? Ite sunt fatende pro illebiare custas mesuras?

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...