Una die pro sa memòria, una die pro Hannah Arendt e pro catzare sa «banalidade» dae a curtzu

Òpera de Tonino Baldari – http://www.arsmeteo.org/

In die de oe, in su 1945, sos russos abergeint sas giagas de Auschwitz e torreint a totu nois cantu disgratziados sunt istados sos tedescos nazistas. Non bastant làstimas e nemmancu lagrimas o dòlimas de coro, non si podet contare a manera umana su chi umanu non est. Ammentemus-nos una cosa: sos nazistas chi ispistiddaiant sos ebreos faghiant totu su chi podet fàghere unu cristianu cale si siat. S’òmine chi faghet male non pro fortza dat s’idea de pòdere èssere malu.

In su 1961 Hannah Arendt sigheit totu sas 120 puntadas de su protzessu Eichmann (famadu criminale nazista) comente imbiada de su periòdicu New Yorker a Gerusalemme. Custu Eichmann no nche barigheit mai su gradu de tenente-colonnellu e si ocupaiat de contivigiare sos trasportos de sos ebreos in sos campos de cuntzentramentu. Si difendeit narende chi isse si ocupaiat de trasportos e bostu.

Hannah Arendt colleit totu sos assentos suos in cussa òpera manna intitulada Sa banalidade de su male iscrita in su 1963. A unu tzertu puntu de su libru iscriet: «Sas malas fatas fiant mostruosas, ma chie las fateit fiat una persone normale, no un’isvariadu o unu dimoniu». Su chi ispantaiat sa Arendt fiat su fatu chi Eichmann non fiat unu tontorrone e chi sa cosa prus mala chi aiat fiat custa: non fiat capatzu de pensare. Gasi comente totu sos àteros non si daiant a bìdere mostros, finas isse pariat normale. Fiotu de gente normale ma cun fainas mostruosas. In palas de custa “mala normalidade” de sa burocratzia, capatza de fraigare sas peus malas fatas mai connotas dae s’òmine, sa Arendt bogat a campu sa chistione de “Sa banalidade de su male”.

Custa normalidade metzana faghet sighire malas tratas a unu tzitadinu cale si siat, a s’òmine chi non pensat a su chi sa regula diat chèrrere nàrrere ma la ponet a cùrrere e bostu. Eichmann nos at fatu a cumprendere cale est su perìgulu mannu de su non pensare. E a dolu mannu nostru de gente comente Eichmann bi nd’aiat meda e in custu meda non b’aiat nen malos e nen isfidiados ma gente che a totu. Est pròpiu custu chi faghet assuconu: unu modellu nou de criminale chi pesat malas fatas chena bi dare, chena pònnere a cumone capatzidade de pensare e de ischirriare intre giustu e irballadu, capatzidade de àere giudìtziu e de serare in ue est sa moralidade.

Hannah Arendt si pregunteit si sa capatzidade de pensare, in sa natura e in sos minùgios suos, podiat bantare finas sa possibilidade de non fàghere su male. Custa banalidade de su male non nos faeddat de su male prus fitianu chi si presentat in forma de maladia o de interessu. Sa Arendt si pongeit custu pensamentu: «Pro fàghere male b’at bisòngiu de lu disigiare?» Colados prus de 15 annos dae s’abertura de Auschwitz Hannah Arendt pesat una nurra de preguntas subra de sas fainas de su male, cun raighinas pagu connotas dae sa filosofia morale e religiosa traditzionale, e aberit a una manera prus funguda de cumprendòniu de su male: «Mi so ispantada ca totu custu ponet in mare artu e malu su cumprèndere nostru in contu de male».

Sas dudas istèrridas a dae in antis a una faina chi at negadu sas teorias de su male connotas finas a cussu momentu, e sa relata crara crara intre su problema de su male e sa capatzidade de pensare, nos torrant bene s’idea de sa banalidade de su male. Finamentas custa banalidade, comente totu sas banalidades, nos podet giùghere a abburrigare* onni bonu faghere. Fuide dae sa banalidade, finas cussa chi bos paret sa prus sintzera, ca proite pro istare bene e in paghe bi cheret fungudumine.

*(mòrrere suta abba)

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...