Proite sos fèstival non cherent “tzertos” iscritores sardos? Ca non sunt a sa moda? Cale moda?

Podent èssere finas de prus, ma nde tzito chimbe: “Lettera a un giovane sardo” (1996) de Bachis Bandinu, “Chent’annos, cantadores a lughe ‘e luna” (1996) de Paulu Pillonca, “La vera storia della bandiera dei sardi” (2007) de Franciscu Sedda, “Pitzinnos, Pastores, Partigianos” (2012) iscritu a bator manos dae Piero Cicalò, Pietro Dettori, Salvatore Muravera e Natalino Piras, “Il sardo una lingua normale” de Pepe Corongiu.

Pro non mi leare pro macu bos naro su proite no apo postu in elencu “Passavamo sulla terra leggeri” (1996) de Sergio Atzeni. Non l’apo fatu ca proite est un’autore pro contu suo. Iscritore cuadu pro una parte bona de sa bida, sa morte nos l’at torradu a sa moda. Mentovu meritadu, s’intendet, Atzeni est unu chi at brotadu arresonu culturale pro totu sos sardos, ma sigomente si nch’est mortu in antis de su tempus de sos «fèstival a totu coddu» mi paret giustu, nessi inoghe, de non lu mentovare.

In Sardigna nch’amus semper àpidu iscritores chi benint lèghidos isceti inoghe. Forsis finas in aterue est gasi, ma in Sardigna sos chi faghent s’arresonu culturale prus bìvidu e sentidu sunt pròpiu custos. Non bògio nàrrere chi Murgia, Fois, Niffoi e Soriga non bendant libros in Sardigna (tzertu chi los bendent!), ma prus che àteru naro custu: pro cantu siant connotos e mentovados s’arresonu culturale chi naschet dae sos libros issoro no est mai cussu bìvidu comente printzipale dae sos chi sunt culturalmente impinnados totu s’annu e istant in s’Ìsula cada die. E finas pro sas bèndidas, cunsiderende chi sunt agiuados dae editores italianos mannos, su resurtadu, nessi in contu de calidade, no est pròpiu comente a bèndere 5000 copias isceti in Sardigna, a sardos ebbia, sende publicados dae un’editore sardu minore.

In antis nch’amus àpidu “iscritores cuados” comente a Salvatore Cambosu, Mialinu Pira (finas si mi praghet de prus a lu cramare “Miali de Crapinu”), Bachisio Zizi, Cicitu Masala. In sos ùrtimos binti annos s’istasione culturale sarda est istada marcada finas dae sos libros e dae sos autores chi apo tzitadu a su comintzu de su post. E finamentas issos, si cherimus, e finas si ant bèndidu meda, sighint sa sorte de èssere iscritores cuados a su mundu prus mannu. Gente meda de custu “mundu mannu” est cussa chi partètzipat a sos fèstival. Ma si ses sardu e cheres unu cumbidu pro unu fèstival cheret chi pùbliches pro un’editore italianu o màssimu pro “Il maestrale” (e non semper custu bastat). Sos fèstival sardos buscant mescamente dinare sardu (finantziamentos dae sa Regione), non si cumprendet proite su prus de sas bias in sos programmas issoro mancant sos autores sardos chi ant àpidu una bona resèssida in contu de bèndidas e sunt intrados in su coro de sa gente.

In “Lettera a un giovane sardo” Bandinu nos at postu in oriolu narende.nos chi custa cosa de essere a su matessi tempus gente de su logu e gente de su mundu cheriat cumpresa unu pagu mègius. In su ’96 esistiat giai sa «Nouvelle Vague» sarda, naramus, ma non esistiat s’idea isparta a unu pùblicu mannu de custu beranu culturale (si beranu est). Semper de su ’96 est su traballu de Paolo Pillonca subra de sa poesia a bolu, unu cantu a s’interinada pro unu mundu balorosu chi giai dae tando fiat arrischende s’agabbu. Forsis Pillonca at bèndidu meda a sos chi pranghiant su tempus de sa gara in poesia, levas oramai mannas e fora de marcadu, ma su sutzessu de su libru “La vera storia della bandiera dei sardi” comente lu crarimus? Gana de istòria e sidis de novas prus sintzeras? Beh, carchi cosa b’at. In su 2012 àtera gana de istòria, custa bia subra comente sos sardos ant partetzipadu e bìvidu sa resistèntzia italiana. “Pitzinnos, Pastores, Partigianos” de Piero Cicalò, Pietro Dettori, Salvatore Muravera e Natalino Piras at bìnchidu paritzos record ma in sos fèstival non bi l’apo bidu mai. Sa chistione est sa matessi pro “Il sardo una lingua normale” de Pepe Corongiu, unu libru chi at giradu totu s’ìsula e chi at bèndidu, unu traballu chi at fatu faeddare meda e pesare brigas luadas. Epuru nudda, finamentas in custu casu presèntzia in fèstival zero.

Iscritu custu, potzo duncas nàrrere cale est su meledu meu. A pàrrere de Marcello Fois (l’at naradu prus de una borta) s’autore chi benit lèghidu isceti in Sardigna non si mèritat su cumbidu a unu fèstival comente su de Gavoi. In su 2014 s’est difesu narende chi su fèstival de Gavoi beniat abertu dae tres sardas. Andamus a bìdere chie sunt e cun chie pùblicant. Savina Dolores Massa pùblicat pro “Il maestrale” e de a issa narat chi non li praghet a èssere cramada “scrittrice sarda”. Paola Soriga, sorre de Flavio Soriga, pùblicat pro “Einaudi”. Elvira Serra, giornalista de “Il Corriere della Sera”, benit publicada dae Mondadori. Torrende su cabu a una pregunta (punghe inoghe pro la lèghere: http://notizie.tiscali.it/regioni/sardegna/articoli/14/07/01/intervista-fois-gavoi.html) Fois narat: «Nos ant acusadu de fàghere pagu logu a sos iscritores sardos ma a abèrrere su fèstival ant a èssere sas tres feminas Dolores Savina Massa, Paola Soriga ed Elvira Serra, las amus ischirriadas non proite sardas ma ca sunt bravas». Galu: «Nois cherimus contare sa Sardigna de oe, cun unu tratamentu finas istrintu cun sa traditzione, ma su folk non nos interessat».

A mie paret chi gasi fatende Fois s’arriscat in unu provintzialismu a su revessu, una manera de fàghere chi non retzet. Si Bandinu, Pillonca, Sedda, Piras (e cumpàngios) e Corongiu, cun chimbe libros ant bèndidu prus de trinta mìgias copias, podet èssere folk custu? Ca si est folk tando semus narende chi una pertzentuale nòdida de sos sardos chi leghent  e còmporant libros non balet. E semus finas narende chi un’iscritore sardu est bonu isceti cando si faghet lèghere fora dae Sardigna. Chi sa Sardigna non bastat pro nàrrere: «Emmo, custu est un’iscritore bonu». E si est gasi su giogu est cumpridu ca si ruet torra e semper in s’inghìriu de una tzerta birgòngia de a nois e de una tzerta mala capatzidade de manigiare custa rughe. B’istat de non cramare custos autores a sos fèstival a sa moda e de non faeddare de sos arresonos chi ant postu a cùrrere? S’arriscu mannu est cussu de catzare autores e contos cunsiderados “folk” pro posca fàghere unu “folk metafìsicu” curiosu a beru. Mi pregunto, chie nch’est a beru fora dae sa Sardigna de oe?

*Pretziso una cosa. A mie su fèstival de Gavoi praghet e penso chi su traballu fatu dae Marcello Fois siat importante. Su chi non cumprendo est comente una persone abbista e de cultura che a isse non resessat a bìdere e a serare unu mundu chi at meda ite nàrrere a sos sardos e a sos non sardos. Carchi cosa non torrat, capatzu chi sa neghe non siat isceti sua.

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...